Die Eileidung
Hochverehrde Ramser Kerwegäschd,
Männer, Fraue, Mäd unn Bersch.
Liewe Ramser Leit, liewe Auswärdische,
willkommen zurick in ganz alder Frische!
Endlich hänn mer werre Kerweredd, wie es sich geheert,
ohne eich Kerwegäschd hot des jo alles gar kähn Wert.
Aach en Kerweumzug hänn mer werre uff die Bäh gestellt,
noh 3 Johr Paus is des färr uns es Greschde uff dere Welt.
Aach im letschde Johr gäbbs werre einiche Ramser Helde,
doch dodevor möcht ich eich unsere Frischlinge vorstelle.
In dem Johr sinn mer Kerweborsch werre subber gut uffgestellt,
trotz Corona hänn sich einiche Buwe bei de Kerweborsch gemeld.
De Kevin Humbla hallt schun länger es Tor in Ramse sauber,
jetzt is er bei de Kerweborsch unn helft do mit großer Power.
Schäh is aach, dass de Jonas Schlick zur Kerweborsch gekumme is,
selbscht e gebrochinie Kniescheib is färr den Freckl kähn Hindernis.
De Maurice Hahn dud als Nei-Ramser jetzt aach es Kerwehemd trage,
es weiße Hemd steht dir subber - samt Wildsau, Knepp unn Krage.
Dass de Samuel Said jetzt Kerweborsch is, des finde mer arich gut,
dem sei Brieder waren aach schunn bei uns, do liegt des wohl im Blut.
Als Motto färr de Umzug hänn mer uns es Kerwedenkmal rausgesucht,
ich find: trotz TÜV-Ufflage hot unser Roll des Johr werre e gewalidschie Wucht.
Seit 35 Johr steht es Kerwedenkmal schunn an dere Stell,
wie es zum Denkmal gekumme is, verzähle mer eich do aach noch schnell.
Devor will ich awwer emol an meinem Woikrug zieh,
her liewer Mundschenk, gebb halt mol her die Brieh.
Die Ramser Kerb soll lewe…
Wu issn die Kerb?
Vor 36 Johr hot mer die Kerb noch am Friedhofsacker vergrab,
en tiefes Loch wurd gebuddelt, un dann rinn mit em Sarg.
Dass de Bauer do aach als mol zaggert, hot mer do net bedacht,
drum hänn se 1986 ewich de Sarg gesucht, midde in de Kerwenacht.
Gefunn hänn se die Kerb sellemols net, des war färr die Bagaasch en harte Schlag,
desdeweh hänn se des dennoh aach net in de Wertschaft gesaaht.
Stolz sinn se noh Middernacht in die Bers eihmarschiert,
dass se die Kerb net gefunne hänn, hänn die Leit schnell kapiert.
Ob die Kerweborsch ihr Kerb hänn, des hot die Annemarie gefroht,
"Ajo", hänn die Kerweborsch geplärrt - im Gesischd schunn ganz rot.
Dabber hot die Annemarie unner de Thek en Sarg rausgekrahmt,
"do hänn ihr eier Kerb", unn bevor die erschde Frohg uffkam,
"Aj de Bauer hot letschdens gezaggert sein Feld,
die Kerb hot er gefunne, unn se mir do hiegestellt!"
Im näggschde Johr wurd es Kerwedenkmal dann gebaut,
sodass uns der Bauer nie wieder die Woiflasch klaut.
Her Mundschenk, ich hoff, dass du noch unsern Woikrug noch do hosch,
gebb mir den grad mol her unn plärr du runner zu de Kerweborsch.
Die Ramser Kerb soll lewe…
Es Ramser Bierkaschderenne
Im Juni hänn die Kerweborsch werre zum Bierkaschderenne eihgelahd,
iwwer 20 Teams hänn mitgemach, des hättn mer jo selbscht net geglaabt.
In Ramse hänn mer Plakate uffgehang, do wurd aach känner verschont,
unn annerscht als bei de Glasfaser hot sich des sogar gelohnt.
Als Start vumm Renne wurd Rosedhal auserkore,
do war die finale Rennstreck ah gleih gebore.
Vunn Rosedhal noh Ramse, vunn Kloschder zu Kloschder sozusah,
dass mer do am beschde de Tunnel nemmt, des is jo ganz klar.
Leider hänn die Teams de alde Tunnel net gefunn,
hänn se halt de Weg iwwer de Laschdeberg genumm.
Am Tag vum Renne war e brudali Hitz gemeld,
des war en ganz schännie Quälerei, grad noch des End iwwers Feld.
Wasserflasche hänn mer verteilt, unn des ganz schäh viel,
war aach besser so, so kam aach werklich jeder gut ans Ziel.
Wege de Hitz hänn mer aach noch uffgestellt en ganze Pool,
noh‘m Renne zu bade, war färr jedes Team arisch cool.
Ähn Rosedhaler Kerweborsch hots mol ganz eilich gehatt,
dem war so heiß, der hot sich gleih zum Pool uffgemach,
die Kleider vum Leib geriss, kräftisch Ahlauf genumm,
en astreine Köpper gemach... unn mit de Nohs uffm Bämm uffgekumm.
Blut is geflosse, die Nohs hing ganz schepp,
uns allen war klar, der muss ins Lazarett.
Ich kann eich beruhige: gebroche war die Nohs denoh net,
färr de Maddin aus Rosedhal war trotzdem Zeit färr sein Bett.
Die Letschden vum Renne, die möcht ich do aach noch ahspreche,
die hänn so lang gebraucht, als hätten se en Gebreche.
Die Siegerehrung war schunn ferdisch, do sinn se ahgekumm,
immerhin hänn se arich viel gute Laune mitgebrung.
Bei de Hälft vum Renne, do hänn se en Notruf abgesetzt,
die hatten en Problem: es ganze Bier war schunn weg.
Ob mer noch en Kaschde vorbei fahre kennen, des hänn se gefroht,
die hatten zu viel Dorscht, unn leer war es flissich Brot.
Liewe Kerweborsch do unne, nur färrs Protokoll:
merkens eich färrs näggschde Mol, dass die Jenny unn Nicole,
beim näggsche Bierkaschderenne besser zwäh Kaschde kriehn,
falls se werre uff de halb Streck en ganze Kaschde abziehn!
Gewunne hänn se trotzdem net, is jo aach kähn Wunner,
bei so nem Renne, do laaft halt aach e Rennzeit runner.
Schäh wars trotzdem, dass die Knöllis do mitgemach hänn,
was ihr gewunn hänn, des sinn sicher paar Fans.
Wann ich de Name Knöll heer, fallt mir grad noch ebbes ei,
doch bevor ich des verzähl, nemm ich en Schlickche Woi.
Die Ramser Kerb soll lewe…
Pannedienscht noh Ramse
Apropos Knöll: Liewe Nicole, des hänn mer sicher net vergess:
kärrz vor de Ramser Kerb 21 ... Do is jo noch ebbes gewess!
Zu spät färr die letschde Kerweredd, trotzdem e gudie Geschicht,
denn letschdes Johr, do hots dich jo aach schunn erwischt.
Die Spezialischdin kummt aus Ramse, is mit viele do verwandt.
Zwar wohnt se jetzt in Grünstadt, doch is se efters noch im Land.
In Ramse is ihr Ärwet, fahrt täglich von Grinstadt do her,
nemme dud ses Auto unn quält sich so dorch de Verkehr.
Der Spezialischdin kann mer rate: nemm besser mol de ÖPNV,
so kummsche net in die Kerweredd unn stehsch net emol im Stau.
Noh Feierowend wollt se hämfahre, schnell packt se zamme ihr Zeich,
doch als se de Autoschlüssel rumdrehe wollt, werd se uff ähmol ganz bleich.
De Schlüssel rumdrehe konnt se net, do froht se sich warum,
paar Idee'e hot se, vielleicht hot se jo ähfach de falsche Schlüssel genumm.
De richtige Schlüssel, den hot sie zwar gehatt,
den Schlüssel rumzudrehe, des hot trotzdem net geklappt.
Dabber ruft se in de Werkstatt ah und erklärt denne es Problem,
warum des Auto net ahspringt, konnt die Werkstatt aber aach net verstehn.
Gleih sinn paar Mechaniker aus Hettrum riwwergepehtzt,
de Abschleppdienscht wurd aach kontaktiert, bevor es Auto gar nimmie geht.
Zweh Fachleit sinn riwwer gefahr, um die Karre zu inschpiziern,
gelacht hänn se, denn des mitm Schlüssel kann so jo net funktioniern.
Gut, dass de Fahrer vum Abschleppdienscht is gleih ans Handy gegang,
dem wurd gesaaht, dass er gleih werre rumdrehe kann.
Liewe Nicole Knöll, bevor de es näggschde Mol die Werkstatt kontaktierscht,
prüfschde besser mol, wie dein Automatik-Auto funktioniert.
Um de Schlüssel rumzudrehe, do musche mitm Schalthebel uff "N",
annerschd gehts Auto net ah - do hosch du emol gepennt!
Liewer Mundschenk, bischd du eigentlich noch wach?
Hopp, gebb mir de Woi unn mach dodebei mol Krach.
Die Ramser Kerb soll lewe…
Imker im Homeoffice
De neggschde Spezialischd is Imker unn kümmert sich um Biene,
mer kennt also mähne, mit denne Viecher, do hätt der Routine.
Dass mer selbscht als Experte awwer aach was falsch mache kann,
des bassiert de beschde, aach unserm Bienemann.
Der Sohn vum Imker, der is aach bei de Kerweborsch debei,
in de Kerweredd steht de Vadder dann nadeerlich gleih.
De Sohn hot am Owend devor noch kräftisch Party gemach,
bis tief in die Nacht war der Sohn dann noch wach.
Am näggschde Moje um 6, do is er erschd hähm gekumm,
dass in de Kich noch Imkerzeich leiht, hot er net wahrgenumm.
Mied und betrunke is er ins Bett – des mit allerletschter Kraft,
de Vadder war gar net do, denn der hot schunn geschafft.
Lang hot de Sohn geschlohf, irgendwann wurd er wach,
denn er hot sich gedenkt, was des wohl is färr en Krach.
In de Kiech heert de Sohn nur de Vadder rumriehre,
unn de Bode vunn seim Zimmer dud aach schunn vibriere.
Leise heert de Sohn aach so en ganz dumpfes Summe,
naja, vielleicht hot er im Kopp aach noch en Kater-Gebrumme.
Langsam un vorsichdich is er dann die Trepp runnergewankt,
er hot mol geschluckt, als er gesieh hot sein Schrank.
Uhzählische Biene dun do in de Wohnstubb rumflieh,
de Vadder steht im Imker-Ahzug drin unn versucht se zu krieh.
Die Ursach färr die Haus-Biene, die leiht uff de Hand,
des lag dodrah, dass sich noch Imker-Werkzeich in de Kiech befand.
Die Biene ausm Garde wurden durch de neie Necktar ahgelockd,
unn so hänn emol tausend Biene in de Wohnstubb gehockt.
Mer kennt faschd mähne, dass mer aus sowas gleih lernt,
do dodevun war de Franz Schlick halt emol ganz weit entfernt.
Ne ganze Woch frieher, do is es schunn emol bassiert,
do hot er bissje Necktar in de Garag drapiert.
Dodurch wurden sellemols schunn zichtausend Biene ahgezoh,
unn sinn schnurstracks in die Garage vumm Schlick reigefloh.
Liewer Franz Schlick, mer Kerweborsch hänn gewaldisch iwwer die Geschicht gelacht,
dass Biene so Ärwet machen, des hätten mer aach net gedacht.
Vielleicht wär des awwer mol ne sinvolle Maßnahme,
sein Imkerzeich äfach aus de Kich wegzurahme.
Mer hänn aach geheert, dass du Honiglikör produziersch,
do hätten mer Interesse, verkaaf des doch mol an de Hirsch!
Ich begnüg mich awwer erschd emol mit meinem Woi,
her Mundschenk, plärr du doch mol in die Menge noi!
Die Ramser Kerb soll lewe…
Rallye am Gemähndehaus
Im Keller vum Rathaus, do hänn mer genug Raum,
um die Kerb vorzubereite - unn aach zu verdau'n.
Die Kerweredd zum Beispiel bringe mer do zu Papier,
es kummt aach mol vor, dass mer do trinken en Bier.
Des weeß aach de Spezialischd, war jo aach mol bei uns debei,
do is er mol hochgeschlabbt unn hot getrunke en Woi.
Beim dritten Schorle dann, es war schunn midde in de Nacht,
do hot ihn dann so en alde Bürrostuhl ahgelacht.
Er plärrt begeischdert: "Fahrt mich dodemit mol rum,
ich däd gern emol wisse, ob ich ums ganze Haus kumm!"
Die Rallye ums Rathaus war doch bissje lahm,
bis der Spezialischd dann uff e neie Idee kam.
"Her, mit dem Bürrostuhl kumm ich aach runner uff de Marktplatz!",
oh yesses, mer hänn nur gehofft, dass er dodebei net abkratzt.
Liewe Kerwegäschd, mer wolltens dem werklich abrate,
doch unsern Freund, der is halt äfach en Mann der Tate.
Schnurrstracks is der de Kloschderberg mitm Bürrostuhl runnergepehtzt...
bei de Grundschul dann, hot er sich uff die Gosch geleeht.
"Helfen mir hoch!", heeren mer den dann noch schreie,
unn denoh nur "heert uff, lossen mich ähfach nur leie!"
Mer müssen mol sah, mein liewer Kharim Said,
dass dein Hähmweg vum Kloschderberg is schunn arich weit.
In so großie Gefahr bringe musche dich desdeweh awwer net...
immerhin wars färr uns lusdisch, des machts fascht werre wett.
Oer Mundschenk, des mittm Bürrostuhl war schunn e gefährlichie Sach,
des muss ich erschd emol verdaun, mach du so lang mol färr die Leit Krach!
Die Ramser Kerb soll lewe…
Die Erbsegass
Im Friehjohr gabs färr die Kerweborsch werre en Projekt:
mer hänn de greschde Missstand in Ramse uffgedeckt.
Am Hersch hängt schunn seit Johre so en dabbisches Schild,
"Mühlstrohß" steht do druff, aj, do werd ich jo ganz wild.
Zuminneschd färr uns Kerweborsch steht des do schunn immer feschd:
Erbsegass häßt die Strohß, alles annere gebbt uns de Reschd!
Aach es Parkverbot wurd uffgehob durch des neie Schild,
weil es Parkverbot jo offiziell nur in de Mühlstrohß gilt.
Die Ahwohner därfen also werre ehr Autos uff die Gass stelle,
des mitm Parkverbot war jo sowieso schunn net so helle.
Ich kann eich sah: Wann do känner in dere eng Strohß parkt,
braucht sich känner zu wunnere, wann mer do mit 60 dorchfahrt.
Als Kinner hänn mer als noch in de Erbsegass gespielt mitm Fußball,
des geht heit nimmie, weil do bassiert jo dann gleih en Uhfall.
Es letschte Projekt vunn uns war des net, des hänn mer schunn feschdgeleht,
denn aach die Ripperter Strohß gäbbts net, denn des is jo de Clauser Weg.
Her Munschenk, ich gugg mir grad noch emol es Erbsegass-Schild ah,
plärr du noch emol runner, dodemit bischd du jetzt mol werre drah.
Die Ramser Kerb soll lewe…
Glasfaser färr de Hersch
Die Deitsche Glasfaser war in de Ramser Gemäh uff Stimmefang,
so wurden net nur färrs Bierkaschderenne fleißisch Plakate uffgehang.
33% der Ramser mussten en Wisch bei denne unnerschreiwe,
damit die dann die Digitalisierung in Ramse ahtreiben.
Annere Gemähnde hatten durch die Deitsche Glasfaser schunn ihre Probleme,
doch des war färr die Gemäh gar kähn Hindernis färr des Unternehme.
In Ramse hot mer iwwerall die blauen Schildscher gesieh,
an Haiser, Stroßelaterne un sunschdwu hänn se Werbung dodevor hie.
Die denken wohl aach, dass sich des färr Feierwehrleit im Eihsatz rendiert,
annerschd weeß ich net, warum mer aach Werbung iwwer Hydrante-Schilder mondiert.
Wundert eich net, falls in Ramse bald mol e ganzie Buddig abbrennt,
des liegt dann dodrah, dass mer Werbung iwwer Hydrante-Schilder hängt.
Aach viele Haiser hänn was uffgehang, wo druff steht, dass sich Glasfaser jo lohnt,
doch dodevun waren viele Haiser schunn seit Johre gar nimmie bewohnt.
Vunn de Deitschen Glasfaser wurd werklich känner verschont,
geklingelt hänn se aach bei jedem, der do in Ramse wohnt.
Alte Leit aus Ramse wurden do aach gleih druff ahgesproch,
bei denne hänn die Glasfaser-Leit noch viel mehr druffgepocht.
Zur Unnerschrift wurden die dann do schnell mol gedrängt,
obwohl die alten Leit oft net emol en Computer oder Handy hänn.
Aach de Hersch wurd ahgesproch, ob er des wohl macht,
aber de Uwe hot abgewunke unn äfach nur gelacht.
De Uwe hot noch alte Kupperkabel in seinem große Hotel,
deshalb ging des Internet in de Zimmer eh net so schnell.
Des hot der aach schunn ausgemess, er is jo net bleed,
unn gemerkt, dass drowwe es Internet eh nur mit 50 Milliliter geht.
Dass mer es Internet jetzt in Liter messt, des wär mir jetzt neu,
her Uwe, mach dir nix draus, dei Expertise leiht halt eher beim Woi.
Apropos Woi, mein Hals is schunn werre ganz trucke,
geb mir mol de Krug, ich brauch jetzt mol werklich was zu schlucke.
Die Ramser Kerb soll lewe…
Kärrzgeschichte
Mer Ramser, mer sinn bekanntlich schunn wahrlich adrett.
Doch en dickes Nervefell? Naja, des hänn mer wohl net.
Ähn Spezialischd, der werklich kähn dickes Nervefell hot,
aj der hot des Johr aach mol werre was verbockt.
Mojens is er mol werre de Erschde uff de Ärwet gewess,
zum Middag hätt er sich gern mol beim Stelzer in de Hof gesetzt.
Des war awwer leider käh leichdie Ahgelegeheid,
denn es Hoftor hot ihm en ganz schähne Kummer bereit.
Es Hoftor hot leider geklemmt wie de Deiwel,
feschd hot er gerittelt, er hatt schunn Selbschdzweifel.
Mit beide Hähnd hot er ans Hoftor gewäsch wie e Sau,
... unn sich dann es Hoftor glatt gege die Nohs gehau.
Geblut hot de Uli Hahn, so wie die Fisch, die er als schlacht.
Unn de Stelzer im Hof? Der hot äfach bloß gelacht.
Wann mer grad do die Redd hänn vumm Ramser Stelzer Markus,
wolle mer den aach noch erwähne, so dabber vorm Schluss.
Paar Leit hänn owends bei ihm am Lagerfeier gehockt,
es Feier war so hoch, des hot sogar Leit in Stähborn geschockt.
Die Ramser Feierwehr wurd dabber vunn Stähborn aus alarmiert,
als die im Hof vom Stelzer standen, hat der sich mol arich scheniert.
Die Feierwehr fands bestimmt subber, dass es nur um en Grillowend geht,
iwwer paar Wörschdcher vum Grill hänn die sich gefräht.
Kerwebersch unn ihr Müdder, des is aach so ne Sach,
dass mer so viel tringe däden unn machen würden so viel Krach.
Sowas krieht mer als Kerweborsch efters mol zu hehre,
doch unsere Müdder, die hänn aach mol was zu verberge.
De Weiße Till, der hot also mol paar Kratzer in seiner Karre,
der froht sich als: "Welcher Dolle macht dann so Sache?"
Vor lauter Verzweiflung froht er dabber mol sei Mamme,
"her, Mudder, wuher kummen dann die viele Schramme?"
Als Antwort krieht de Weiße Till dann nur zu hehre,
dass die Mudder des als is, es Auto käm ihr in die Quere,
beim Eiparke in de enge Hof muss sie als mol rangiere,
unn seitdem dun halt mol paar Macke es Auto vom Till ziere.
Her Weiße Till, mach dir nix draus, denn du bisch zwar de Sohn
doch net ohne Grund hot aach dein Auto ne Knautschzohn.
Liewer Mundschenk, hänn mer eigentlich noch Woi in unserm Stäh?
Loss du noch emol die Kerb hochlewe, des wär jetzt wärklich schäh!
Die Ramser Kerb soll lewe…
De Schluss
Liewe Ramser Kerwegäschd: jetzt kummt de Schluss,
des häßt awwer net, dass mer schunn hähm gehe muss.
Ich hoff, mer siehn uns gleih all noch uffm Kerweplatz,
genug zu Trinke gäbbts, so macht aach de Kalli Koppold Spaß.
Wie jedes Johr kann mer die Kerweredd aach werre kaafe,
dozu missen ihr bloß zu uns Kerweborsch laafe.
An die vielen Helfer wolle mer do noch en großes Dank ausspreche,
denn es Engagement vunn denne is viel zu selten uff de Bildfläche.
Bedanke wolle mer uns aach bei de ganze Alt-Kerweborsch,
paar vunn denne sinn heit mit uns derch die Ramser Gasse dorsch.
En großes Danke geht aach an en Mitarbeiter der VG, de Christopher Krill,
bei Organisation vum Umzug hot er es meischde gemach, do kann mer sah was mer will.
Werbung wolle mer aach noch emol färr die Ramser Wertschafte mache,
wann die aach noch zumache däden, hätte mer all noch viel wenicher zu lache.
Viel mer Worte will ich vunn do drowwe aach net verliere,
liewer will ich gleih mol an de Kerweplatz marschiere.
Bevor mer jetzt awwer fahrn enunner,
plärr ich noch emol unsern Spruch runner!
Die Ramser Kerb soll lewe… HOCH!
Copyright © 2021 Ramser Kerweborsch – Alle Rechte vorbehalten.
Powered bei Schorle und Bier.
Unsere Website verwendet Cookies. Durch weitere Nutzung dieser Website stimmst du der Verwendung von Cookies zu. Datenschutzerklärung