Die Eileidung
Hochverehrde Ramser Kerwegeschd, Männer, Weibsleid, Mäd unn Bersch.
Corona hot uns aach des Johr leide geloss, do sinn in Ramse efters mol eh paar Drähn gefloss.
Fassenachd, Vadderdag, Maifeier: des wurd alles abgesaaht,
des war aach färr uns Kerweborsch des Johr arich schad.
Umso glicklicher war mer, als die Ufflage färr Feschdcher im Herbschd lockrer warn,
färr en Ausschank am Kerwefreidag hatte mer uns dann gleih mol mim TuS zamme getan.
Viel Kraft, Fleiß unn Energie hänn mer do in die Planung gesteckt,
doch weh ner dabbisch Ufflag vum Dunnerschbergkreis is der Plan gleih werre verreckt.
Des is in Ramse bekannt, des weeß do jeder Mann und jedie Frah:
die Kerb werd in Ramse um Middernacht ausm Grab gedrah!
Wege nem Beschluss vum Dunnerschbergkreis war des awwer leider net meglich,
denn laut de Verordnung war en End vum Feschd schunn um Elfe needich.
Desdeweh hänn mer Kerweborsch dann doch nix am Kerwefreidag gemach,
färr Ramse sinn so kärrzfrisdische Ufflage vum Kreis halt eefach e bleedie Sach.
Die 23-Uhr-Ufflag war net emol äh Sach vum Bund oder Land,
des hat de Dunnerschberjer Landkreis selwer in de Hand.
De ganze Corona-Uffwand hätt sich färr 3 Stunne Ausschank äfach net rendiert,
noh de ganze Planung färr unser Kerb warn mer Kerweborsch dann entsprechend fruschdriert.
Dennoch sinn mer all heit färr die Kerweredd zamme gekumm,
des hot uns de Dunnerschbergkreis dann doch net genumm.
Trotz Corona hänn mer Kerweborsch des Johr werre Zuwachs gekrieht,
uns fräht, dass mer als Grupp aach ohne ne gescheidi Kerb gut in die Zukunft sieht.
De Miggi Arontes unn de Mike Krämer sin werre bei uns an Bord,
die warn jo aach lang genug vunn de Kerweborsch fort.
Mim Marc Langestäh is aach werre änner vum Rippert in de Grupp drin,
des is en sau gude Koch unn dodemit färr uns sischer en Gewinn.
De Daniel Baumbauer begrieße mer aach mit ner wehenden Fahn,
dein Einstand in die Kerweborsch war werklich erschdie Sahn!
De Aaron Heidenreich, Nico Hibinger unn de Ben Berkel sinn jetzt aach bei uns debei,
des hot uns gefräht, desdeweh begleide mer des jetzt aach ehmol mit nem laude Schrei.
Die Ramser Kerb soll lewe! Aller Mundschenk, des hoschde subber gemach,
die Stimme vunn de Kerweborsch sinn jo werre e gewaldischie Macht.
Jetzt wolle mer awwer mol zu de Ramser Gschichde kumme,
dem äh oder annere werd gleih vor lauder Scham de Schädel brumme.
De verhexte Hersch
Dass an Fassenacht in Ramse Hexe ihr Uhwese treiwe, des is iwwerall bekannt.
Doch eh Hex im Oktober? Im Hersch? Des gabs noch net im Ramser Land.
Kärrz noh de Kerb hot im Hersch e Frah eigecheckt,
unn hot de Uwe unn sei Gäschd ordentlisch geneckt.
So manscher do unne werd jetzt klage,
„Sahmo, du kannschd doch zu dere arm Frah ned efach Hex sage!“
Doch innerhalb vum Hersch, do werd mir iwwerall beigepflischt,
dass de Ausdruck vunn ner Hex ganz schäh basst zu dere Gschicht.
Doch fange mer mol beim Ahfang ah,
vielleicht werd em Reschd do unne einisches klar.
Unn zwar is Freidagmiddags eh fremdie Frah in de Hersch eihmarschiert,
unn hot kärrz denoh schunn gewaldisch an nem schlofende Kerweborsch rumgeriehrt.
Irschendwann is der Kerweborsch dann mol uffgewacht,
unn hot vor Schreck gleih mol en Satz noh vorne gemach.
Im Affekt hot der se direkt als Hex bezeichnet,
unn denoh war se gleih mol als Magierin gezeichnet.
Am neggschde Dag war de Hersch dann mol werre vunn Betzefans besetzt,
die Fähischkeite vunn de Betzespieler hot de Gäschd werre arich zugesetzt.
Die Leit im Hersch warn dann awwer trotzdem ganz schäh froh,
denn die nervisch Hex war zu dem Zeitpunkt gar net do.
De Stammdisch hot dann gleih mol de Uwe noh de Hex gefroht,
der hot gelacht unn hot gemähnt: „Aj die is mim Bese mol in de REWE gefloh.“
Am Owend kummt dann en Ahruf, de Uwe hot sich schunn kaum gedraut, de Herer hochzunehme,
denn uffm Display vum Telefon stand schunn, dass am Herer is die Marktleidung vum REWE.
Do hieß es: “Herr Schöneberjer, mer hänn do ehnie vunn ihre Gäschd,
die hot kähn Geld debei und hockt do grad in unserm REWE feschd.“
Die Geldbers hot se wohl verlor, unn do kummer mer gleih zum neggschde Problem:
ohne Geld färr en Taxi kummt die Hex net emol vunn Eiseberg häm. D
e Uwe hot se dann dabber vum REWE abgeholt,
die Leit im Hersch hänn do schunn ganz schäh gejohlt.
Baarfiesisch unn fix unn ferdisch is se dann mim Uwe in de Hersch geloff,
leider hot se wohl gesoff,
unn desdeweh net emol mim Laptopstecker die Steckdos getroff.
Unn … oer, ich wills gar net sah, weils mich devor schunn were graut,
als Lösung äfach uff die Steckdos druffgespauzt!
Spädeschdens denoh hatte mer als Kerweborsch dann nur noch ähns im Sinn:
die Hex, die muss des Johr in unser Kerweredd rin.
Nydia, du kummscht zwar net aus Ramse, aber mer wollen dir trotzdem hier mol sah:
mim Kärrzurlaub in Ramse, dodemit hoschd du de annere Gäscht kähn Gfalle gedah.
Wann du mol werre noh Ramse kumscht und in de Hersch gehsch,
brauschd du dich net zu wunnere, warum de Gänsberg uff ämol Blocksberg hehßt.
Ich steh zwar net uffm Blocksberg, dodevor uffm Stapler,
Mundschenk, gebb mir mol den Woi, bevor ich runnerflieh wie en Adler.
Die Ramser Kerb soll lewe!
Wo guggschn du hie?
2020 war en scheiß Johr, Corona kam do de Kerweplanung in die Quere,
aach annere Feschdcher warn abgesaht, des missn mer eich alles net nochemol verzähle.
Ledschdes Johr im September hänn mer awwer trotzdem bissje was gemach,
denn es Ausgrabe vunn unsrer Kerb geheert schunn immer zu de Kerwenacht.
Im Voraus: des Johr sinn die Kerweborsch aach net verschont geblibb,
denn mer hänn uns ähfach mol selbschd in die Kerweredd geschribb.
Zamme sinn mer ans Denkmal gegang, de Schlissel färr die Dähr schunn in de Hand,
"Endlich werre Kerb!" Mer als Kerweborsch warn außer Rand unn Band.
Uff ähmol merke mer, dass de Kerweborsch mim Schlissel werd ganz blass,
weil de Schlissel färrs Denkmal des Johr gar net in des Schloss rinbasst.
Mit de Taschelamp hänn mer geguggt, warum des des Johr net klappt,
do hot doch änner Stöckscher und Müll ins Schloss vum Denkmal gemach!
Mer warn fuchsdeiwelswild, des hots in iwwer 30 Johr Denkmal noch nie gegeb,
dass uns so en Bleedkopp versaut hot die Ausgrabung vunn de Kerb!
Am Freidag hänn mer des Problem leider nimmie gelöst gekrieht,
dodevor war de Schorle an dem Kerwowend aach en bissje zu dick.
Am Owend vum Kerwedienschdag hänn mer dann werre all zamme im Hersch gehockt,
die Kerweredd, de Gläserverkaaf unn die Stäh-Tour hänn mer wie immer arisch gut gerockt.
Beim Zammehocke im Hersch fallt uns do awwer plötzlich werre inn:
"die Woiflasch leiht jo noch im Kerwedenkmal drin!"
Doch net nur des war bleed, mer hänn aach an die Zukunft gedacht,
wie mer die Beerdichung um Middernacht trotz em verschlossene Kerwedenkmal meglich macht.
Dabber is de Maurer hinner gerannt unn hot en Schlagbohrer ahgesetzt,
Funke hän gesprieht, Lärm hots gegebb,
Schlagbohrer verheizt, Nachbarschaft in Schrecke versetzt,
noh ner halb Stunn Lärm hot er dann awwer doch die Stahldeer uffgefetzt!
Glicklich unn zufriede kummt er zurick in de Hersch gerannt,
losst die Kerb hochlewe, denn endlich hänn mer die Woiflasch in de Hand!
Kärrz denoh hänn mer dann awwer es neggschde Problem gesieh,
"wie kriehn mer dann jetzt mit nem verheizten Denkmal die Beerdichung hie?"
Die Antwort, die hänn mer als Kerweborsch nadeerlich gleih gehatt,
unn hänn uns dabber vor de Zwelfe ans Kerwedenkmal uffgemach.
„Mim Schweißgerät in de Hand brutzeln mer jetzt die Deer vum Denkmal zu!“
Do hänn mer Kerweborsch aach mol werre en Johr lang Ruh.
Beim Bruzzle is dann noch en legendäre Spruch bassiert,
der wird aach heit noch oft im Hersch zitiert.
De Reinhard Hahn, aach Goggel genannt, hot uns beim Schweiße unnerschditzt,
der hot uns vorgewarnt und vorm grelle Licht beschützt.
Als es Schweiße mol net lief wie gschmiert, hot er gfroht: „Wu guggschn du hie?!“
Als Antwort wurd ihm vum Michel Rödel nur „Aj, voll nei!“ entgege geschrie.
Was ehr jetzt an dere Gschicht am beschde finne,
missen ihr als Zuhörer mol selbschd bestimme.
Eh Kerb, die eigentlich nur 15 Minudde lang ging,
unn en Kerwehemd, des beim Schweiße am Denkmal faschd noch Feuer fing.
Ich sieh schunn, mein Mundschenk, du bisch aach schunn on Fire,
loss des Stäh awwer net falle, sunscht werd des färr dich heid ganz schäh deier.
Die Ramser Kerb soll lewe!
Fleißisches Bienche, armie (Wild)sau
Liewe Ramser Leit unn Kerwegäschd, Iwwerfleiß dud ah net immer gut,
drum is es besser, wann e Wildsau aach mol gemietlich ruht.
In de Staafer Stroß gebbts jemand, der kann des bestätische,
unn werd sich so schnell aach nimmie betätische.
Unsern Freund hot sich nämlich zur Mäschderpriefung ahgemeld,
unn wurd per Brief zum Priefungstermin eihbestellt.
Es Herz vum Priefling, des hot gleih bis zum Kopp gepocht,
denn die Priefung, so liest er, die is jo schunn in ähner Woch.
Vumm Druck vunn de Priefung war er dann gleih befliegelt,
unn hot sich de gesamte Stoff in ähner Woch ringeprügelt.
Mit seim Wisse im Gepäck is er zur Priefung gfahr,
mim Lächle uff de Lippe, des kann ich eich do mol sah.
In de Meeschderschul is er noch mit ner subber Laun ahgekumm,
hot de Raum awwer net gfunne, dabber is er do mol zur Ahmeldung.
Selbschdbewusst wie er is, hot er die Eiladung uff die Disch geleeht,
doch die Antwort vunn de Frah war färr de Priefling werklich käh Freed.
„Des is jetzt färr Sie, liewer Herr Max Rieder, sicher aarich dumm.
Awwer vielleicht guggen Se es neggschde mol bissje besser uff es Priefungsdatum!“
Unsern Freund hot sich, eifrisch wie er is, äfach im Priefungsjohr verdah,
unn is desdeweh en ganzes Johr zu frieh zur Meeschderpriefung gefahr.
Aller, dange färr die gute Gschicht, liewer Max Rieder,
ich hoff, mer siehn uns aach in die neggschde Kerweredd wieder.
Mer trinken all jetzt mol noch ähnner uff dich,
un du, liewer Uli, kreisch mol bitte, unn zwar desmol rechd hefdisch.
Die Ramser Kerb soll lewe!
De Drive-In vum Hettrumer Wochemarkt
Die Leit in Ramse, die kennen sich jo schunn arich glicklich schätze,
denn uffm Land, do krieh mer kulinarisch efters mol en paar Schätze.
Des is do net wie in de Stadt, wo mer Gemies nur vumm Grosso unn vum Aldi krieht, weil de Bauer do im Umkreis sein Zeich aach uffm Wochemarkt ahbiet.
Des is schäh und lohnt sich aach wehge de Qualidäd,
des schmeckt mer gleih, wann mer dehäm es Fleesch in de Pann ahbrät.
Die Spezialischdin vunn dere Gschichd, die hot sich des aach gedacht,
unn hot sich am Montag Vormiddag noh Hettrum zum Wochemarkt uffgemach.
Mim Auto is se dorch de Wald gfahr unn hot vorwärts eihgeparkt,
vunn do aus hot ses aach gar net weit bis zum Hettrumer Wochemarkt.
Ausgestieh, eihgekaaft, es Gemies in de Kofferraum geleeht,
weils jo gleih werre in die Heimat noh Ramse geht.
Rickwärts auszuparke, des hot die Frah awwer leider net gewollt,
deshalb is se dann ehfach vorwärts vum Parkplatz nausgerollt.
Des mit de Ausparkerei, des hätt aach faschd gut geklappt,
nur dass vor ihr de ganze Wochemarkt uffgebaut is, des hot die Frah leider net bedacht...
"Ach, egal", dacht se sich unn is efach weitergefahr,
selber Schuld, wann do halt mol en Besucher im Weg war.
Do hänn die Leit halt mol gugge misse unn sinn mol en Schritt zur Seit gegang! ...hätten se des net gemach, hätten se halt emol uff de Motorhaub gehang.
De Stand mim Obschd unn es Bäckerauto hot die Frah dann aach noch touchiert,
mim Sachschade vunn paar hundert Euro hot sich de Markt-Besuch dann gleih noch mehr rendiert.
Dodenoh hänn die Leit vum Markt dann doch noch die Frah dezu bewegt,
dass mer dann doch besser zu Fuß iwwer de Hettrumer Wochemarkt geht.
Liebschde Frah Rieder, mer wolln Ihne vunn do drowwe noch kärz sah,
mim Auto iwwer de Wochemarkt, des klingt doch schunn so noh Gfahr.
Mer Kerweborsch finnens awwer schäh, dass die Rieders so sehr zamme haltn,
unn sich dann gleih mol zwee vunn denne en Platz in de Kerweredd kralln.
Dass de Hettrumer Wochemarkt en Drive-In hot wie de McDonalds, des wär mir jetzt gewaldisch neu,
oer Uli, uff den Schock brauch ich jetzt erschd emol en kräftische Schluck vum Woi!
Die Ramser Kerb soll lewe!
De Schluss
Ihr liewe Ramser, mer hoffen, ihr hänn aach mol bissje iwwer die Spezialischde gelacht, es Schreibe vunn de Kerweredd hot uns wie jedes Johr arich viel Spaß gemach.
Noch en kärzer Dank an die Leit vom TuS, dass mer des Johr die Kerweredd do halte kennen,
do missen die Kerwegäschd aach net färr die Redd vum Sportplatz zum Marktplatz rennen.
Mer hoffen, dass die Ramser Fußballer es heit mol hiekriehn, die Dinger rinzuschieße, wann mer sich de ledschde Elfmeder vum Tschierschke ahguggt, krieht mer als Ramser jo die Krise.
Mein lieber Tschierschke, hättscht du vorm Pokalspiel in Weidethal mol mehr gesoff, hättscht du den Ball vum Elfmeterpunkt aach bissje besser getroff.
Wie jedes Johr gebbts aach werre Gläser vunn de Ramser Kerweborsch,
in denne Gläser krieht mer noch besser gestillt den viele Dorschd.
Wer Gläser will, kann uns Kerweborsch gern druff ahspreche,
ob de Vorrat reicht, können wir eich awwer vum Stapler runner net verspreche.
Desdeweh lohnt sichs wie jedes Johr schnell beim Kaahfe zu soi,
denn aus nem Kerweborsch-Glas schmeckt mer gleih noch besser de Kerwe-Woi.
Net zuledschd hoffe mer, dass neggschdes Johr werre gscheit Kerb gfeiert werd,
weil die Ramser Kerb sischer zum Hehepunkt vum Dorflewe in Ramse geheert.
Moje siehn mer dann werre viele vunn eich uff unsrer Stäh-Tour,
ich sieh schunn kumme, am Owend werd des färr uns eh werklichi Tortur.
Denne viele helfende Hände, denne wolle mer hier aach mol Danke sah,
ohne eich wäre mer Kerweborsch sischer gewaldisch arm drah.
En Dank aach an de AGGES, de TuS, die Feierwehr unn de Schützeverein:
Ramse halt in schwere Zeite zamme, so sollte des in so nem klähne Ort wie Ramse aach sein.
Schad, dass es mit unser Kerb net wie geplant geklappt hot,
des hänn awwer sischer net wir als Ramser Team verbockt.
Neggschdes Johr wird färr uns die Kerb werre schäh,
unn jetzt kumme mer zum End, bevor ich die Buchstabe do nimmie seh.
Liewer Mundschenk, uff die Helfer losse mer jetzt nochemol die Kerb hochlewe,
trink du mol en Schluck vumm Woi, jetzt loss ich mol de Bämm vum Sportplatz bebe!
Copyright © 2021 Ramser Kerweborsch – Alle Rechte vorbehalten.
Powered bei Schorle und Bier.
Unsere Website verwendet Cookies. Durch weitere Nutzung dieser Website stimmst du der Verwendung von Cookies zu. Datenschutzerklärung