Leider können wir euch in diesem Jahr die traditionelle Kerweredd nicht wie gewohnt auf unserem Marktplatz vortragen.
Dennoch wollen wir euch die folgenden Ramser Geschichten nicht vorenthalten. Viel Spaß mit der Kerweredd!
Natürlich gibt es auch in diesem Jahr die Kerweredd in gedruckter Form.
Offizielle Kerweredd-Fachgeschäfte:
Ramosa-Markt, Servicepunkt MaGo, Landgasthaus zum Hirsch
Preis: Färr umme!
Schon alle vergriffen? Schreibt uns!
Ihr liewe Leser, ihr liewe Leserinne,
färr des Johr kenne mer wohl all net viel abgewinne!
Es Coronavirus is im Februar gekumm,
unn hot uns unser Ramser Kerb genumm!
Um unser Kerb awwer doch bissje zum Lewe zu erwecke,
wolln mer hier mol greische - vunn de Erbsegass bis zur Paffehecke,
mer lossen heit mol gewaldisch die Fetze flieh,
bis mer aach uffm Rippert die Kerb kann sieh!
Ganz losse mer uns unser Kerb ned versaue,
des les ich do, mitsamt de Kerweborsch-Sauklaue:
kähn Virus kann die Ramser Kerb zu Tode ringe,
desdeweh muss de Mundschenk mol dabber do drowwe singe:
DIE RAMSER KERB SOLL LEWE!
Paar Ramser hänn sich iwwer die Kerb schunn bei uns beschwert,
weil die Kerweredd jo eigentlich am Kerwe-Sunndach vedehld geheert.
Stattdesse hänn die Ramser an de Kerb bloß die Kerwe-Gläser bekumme,
do devor kriehn ihr die Redd awwer jetzt aach färr umme.
De Grund färr die Verspädung lag wohl bei uns - unn des war werklich vermeidbar:
die Kerweborsch hot vor de Kerb die falsch Kerweredd uff die Gemäh gfahr!
Desdeweh wurd die Redd 500 mol falsch gedruckt,
als mer des gsieh hänn, hänn mer all mol bleed geguckt!
An dere Stell wolle mer uns bei denne 5 Lehrlinge vunn de Gemäh entschuldiche,
die hättn sischer aach was besseres gefunne, die 4 Stunne bis zur Paus rumzubringe.
Aus demm Grund hänn die Ramser die Redd zu spät gkrieht, des is uns werklich peinlich,
bitte verzeihn uns des unn lesen dabber die rischdich Redd, still unn heimlich.
Trotz Corona därff ich do drowwe e neii Wildsau begrieße,
der kann gut kreische unn sich gewaldisch gut abschieße,
de Jonas Happersberger hot des Johr sei Kerwehemd ah,
ach Gott sinn mer froh - ohne Eichung gebbs trotz Corona sischer e Eklat…
Bevor ich awwer zu de dollschde Ramser kumm,
wollt ich eich mol verzähle, was die Kerweborsch hänn des Johr unnernumm.
Die Kinnerhilf Sri Lanka, samt de Familie Erdelt,
die hot käh Problem dodemit, dass die Kerweborsch-Bruschd mol bissje aahschwellt,
die sinn froh, dass mer uns mol bissje auslewe kennen,
die wissen, dass mer all färr de Schorle-Ausschank brennen!
Fleißich hänn mer färr Sri Lanka uff nem Benefizkonzert Getränke serviert,
unn aach iwwer die Kerweborsch-Kass hot die Kinnerhilf bissje was kassiert.
Mit de Stumpfwaldhexe hänn mer aach bissje was vorgehatt,
ach Gott, hänn mer die Fußballer beim DKMS-Turnier plattgemach!
...de Spaß beiseite, gewunne hänn mer do sischer ned,
dodevor sinn mer Kerweborsch wohl aach bissje zu fett…
De Grund färrs Jedermanns-Turnier war awwer sischer ned es Gewinne,
registriern eich bei de DKMS! Wann ihr mol Blutkrebs hänn, wär des wohl aach in eierm Sinne!
Uff fremde Umziehch durfte mer des Johr a ned winke,
do musste mer halt in unserm Stumpfwald unser Schobbe trinke.
Als mer dann mol bissje im Wald unnerwegs warn,
hänn mer gleih gsieh: beim dem Mill verreckt uns gleih de letschde Farsan!
Elwedritsche, Wildsai unn aach unser Reh,
mähnen ihr, die frähen sich, wenn mer denne unsern Plastikmill ahdreh?
Ihr Ramser, achten mol bitte bissje do druff:
wann ihr im Stumpfwald unnerwegs sin, hebn bitte eiern dabbisch Abfall uff!
Kärrz vor de Kerb hänn mer bei de Audowasch-Aktion vunn de Hexe mitgemacht,
oer Leit, floss do Wasser, die Kerweborsch hot geglaabt, mer wern do uff ner Seeschlacht,
mer missen awwer sah, des hot sich mol gewaldisch gelohnt:
die Leit hänn gespendt färr Millehmer un e neie Sitzbank, die bald am Kerwedenkmal thront!
Die Ramser Kerweborsch hot sich des Johr mol bissje besser ahgestellt…
unn uns ned so wie die Leit vunn denne Gschichde, die gleih kummen, bloßgestellt…
Was die hänn ahgestellt, ach Gott, des heern ehr gleih,
vorher kriehn ihr vum Mundschenk mol en gewaldische Schrei!
Die Ramser Kerb soll lewe!
Ramse hot ned so viel Eiwohner, faschd 1.800 an de Zahl,
viel neie Leit verirrn sich halt ned emol in unser Eisbachdal.
Mer Kerweborsch sinn zwar aus Frauesicht e werklichi Pracht,
doch es Mädsche aus de Gschichd hot sich en Ewwertsemer aahgelacht.
Färr de neie Freund aus Ewwertsem hot se sich mol bissje schick gemacht,
unn gleih mol tonneweis Klamodde ins Audo eigepackt!
Die Koffer hot se im Audo drin, awwer nur mit Ach und Krach,
leider hot se was vergesse: Ihr Schuhscher uffm Audodach…
Dabber is se losgepetzt, mit 80 dorchs Eisbachdal,
doch dann is se uffgeschreckt, späteschdens am Kerwedenkmal!
Do ruft se ihr Mudder ah, die konnt ihrer Dochter kaum glaawe,
was fallt der aach inn, iwwer en Kätzje driwwerzufahre?
Es hätt wohl gewaldisch gerumpeld, do konnt se sich ned rumdrehe,
die hot sich wohl ned getraut, nem dode Kätzje in die Ah zu sehe,
do hot se liewer ihr Mudder uff die Hauptstroß gschickt,
sodass die den Kadawer vum Stroßeasphalt pickt!
Hoch unn runner is die Mudder uff de Gass im Nachthemd marschiert,
während die Dochder in Ewwertsem mit ihr telefoniert,
noh paar Minudde kam die Mudder dann awwer zur Ruh:
was se iwwerfahr hot, war dann nur de Dochter ihrn Designerschuh!
Ich däd sah, mer sprechen en Lob aus an die Familie Pohl,
bei dem Eisatz war jo mol klar, dass ich se in die Kerweredd hol!
Liewe Marleen Pohl, guck es neggschde Mol besser uff dei Audodach,
ned umsunscht hot dei Audo Kofferraum unn Handschuhfach!
Die Mudder aus der Gschicht, des is unser Astrid,
e dodes Kätzje zu suche, war sischer aach färr dich en gewaldisch heiße Ridd!
Mer finnens schäh, dass die Familie Pohl so zamme halt,
aach wenns dann nur en Schuh war, der geklebt hot uffm Asphalt!
Ich muss aach was suche, ich hab schunn werre Dorschd noh Woi!
Her, kläh Paulsche, basst des iwwerhaupt noch in mein Hals noi?
Die Ramser Kerb soll lewe!
In denne Zeite, wu Corona iwwer unser Erd fehschd,
do kummts ach schunn emol vor, dass mer sich färr de Kerper dorsch de Wald beweschd,
aach die Ernährung muss dodevor ausgelegt soi,
wann mer zum Sport aach noch Salad fresst, trennt sich gleih des Sportlers Wähze vum Woi!
Des hot sich aach unsern Spezialischd gedacht,
unn hot sich nochm Feierowend gleih mol zum Hit uffgemacht.
E griene Salad wollt er sich mol schäh zubereite,
dorsch die Spar-Ahgebote vum Hit geht er dodevun ned emol pleite!
Im Subber-Spar-Ahgebot war die Woch die Saladsoß,
do ging er aach gleih uff de Reschd vun de Saladthek los:
Zur Soß hot er sich gleih noch Grinzeich in die Schees gepackt
unn sich nochm Bezahle dabber in sei Kich uffgemacht!
Wild dud er sich sei Gemies fei schneide,
um ahschließend mit samt de Soß en gesunde Salad zuzubereide.
Als er sich dann vum Geschmack iwwerzeuge will,
sehnt er sich dann doch arich schnell noh seim Grill…
Es Gemies vum Salad war gar ned mol schleschd,
bleed nur, dass die Soß gar ned basst zum Reschd.
Beim Betrachte vun de Saladsoß wurd aach ihm mit nem Schreck klar,
dass dem sei “Saladsoß” eigentlich Vanillesoß war!
Also loss dir vunn uns Kerweborsch sah, liewer Martin Rahn,
beim Eikaafe sollt mer dann doch ned zu viel sparn!
Mer winschn dir zu dere Vanillesoß, die im Hit so wenisch koschd,
dass du zum neggschde Middagesse paar gscheite Dampnudle hoschd!
So e gudi Gschischt brachd zu Corona-Zeide sunscht niemand hie,
desdeweh (unn weh moje) sahn mer dir schunn emol leise “Mercie, Chérie”!
Was jetzt werre kummt, des is wohl net ganz so leise,
jetzt is de Mundschenk drah, werre iwwer den Platz zu greische!
Die Ramser Kerb soll lewe
Vor e paar Johr hatte mers schun ehmol devunn, paar vunn eich werns noch wisse,
do hatte mers in ner Kerweredd vun de Gemäh ehr Koschde-Ersparnisse.
In Ramse stehn Stahl-Poller mit Eiseberjer Hufeise druff!
Sahn mo, was färr en Ramser reschdn sich do ned uff?
Des wissen ihr all, aach die Leit vunn ganz weit fern:
E Ramser Wildsau, des geheert in de Ramser Ortskern!
Aach unsern Spezialischd hot des letschtens in de Hauptstroß gsieh,
denn aach vor die Bank stellen se jetzt so dabbische Hufeise-Poller hie!
Do hot de Protagonischd sich dann uffgereschd, ihr werns mir sischer glaawe,
dem fallt aach nix anneres in, als sei Handy rauszukrame!
Fuchsdeiwelswild dud der sich mit de Kamera bicke,
bei dem seiner Greß geht des arich schnell in de Ricke!
Vertieft in sei Beweisfodos hot ers dann ned emol gepeilt,
dass hinner ihm die Bänkersfrah steht, unn des schunn seit ner Weil!
Dere ihr Urdehl is schnell mol gefällt, dass während er vorm Poller so lacht,
er heimlich Fodos färr sein geplante Bankiwwerfall macht!
Schnell packt er sei Handy ei, unn wie mers vunn nem Bankräuwer kennt,
guckt die Sparkasse-Frah ihm hinnenoh, wie er in sei Fluchtaudo rennt!
Dehäm hockt er sich hie, mit de Fodos im Gepäck,
do kummt aach gleih schunn de neggschde Schreck.
An de Deer klingelts, Polizischde stehn vornedrah
unn sprechen unsern Protagonischd uff sei Fodoaktion ah.
Dabber frohn se, was er do schunn werre schafft,
“färrs Ausspioniere vunn ner Sparkass nemmen mer Sie schnell mol in Haft!”.
Die Bänkerin hot also unnerm Notruf gemeld,
dass es em Spezialischd ging ums ganze Sparkassegeld!
Skepdisch schiddeld er in zwee Meter Heh sein Kopp,
un saaht “Des Geld war sischer ned de Grund färr mein Zwischestopp!”.
Hektisch kramt er in seiner Dasch erum, dabber hott er sei Handy in de Hand,
"Dodebei gings doch nur um die Hufeise-Poller vor unsrer Ramser Bank!"
Uff de Wach hott em e aldie Kollegin beigestann,
die hot dann ach des Wirrwarr mit de Poller verstann.
Servus liewer Krausse Jan, mer kennen dich jo werklich gut verstehe,
aach mir wollen käh Hufeise aus Eiseberg in Ramse sehe!
De wahre Iwweltäter bischd bei dere Gschichd ned du,
sondern die Gemäh! Des Urdehl hänn mer gefällt im Nu!
Die hätten jo mol uff unser Kerweredd von vor zwee Johre heere kenne,
dann missten die Ramser aach ned immer noch iwwer Hufeise schenne!
Oer ihr Leit, bei so Gschichde bekumm ich gleih en truckene Mund!
Her Mundschenk, greisch mol liewer schnell in die Rund!
Die Ramser Kerb soll lewe!
Nun sinn mer Kerweborsch aach schunn zum End gekumm,
liewe Ramser: die Kerweredd 2020 is gleih schunn rum.
Mer leien awwer noch paar Sache uffm Herz,
des wollt ich noch emol los werre, bevor ich do den Woi runnersterz!
Bevor mer den Kerwesunndach noch bissje verdaun,
wolle mer an dere Stell mol en Dank an unsern Bojemeschder raushaun!
Danke Herr Ruschder färr die Unnerstitzung!
Bei de Danksagung därrfen mer nadeerlich aach unser Stammkneip ned vergesse,
denn im Hersch hänn mer wie jedes Johr oft genug gesesse!
Die Ana un de Uwe dun jeden Quatsch mitmache!
Bändcher knippeln, Stäh ausschenke unn aach mol bissje zamme lache!
Danke liewe Ana, danke liewer Uwe!
Die annere Wertschafte in Ramse muss mer do aach mol uffzähle,
aufgrund vunn de Lag an de Hauptstroß kann mer die jo aach ned verfehle.
Danke an die schwarze Katz unn de Agges färr die schäh Zeit!
De Familie Erdelt sinn mer des Johr aach zum Dank verpflischtet,
die hänn ehr Bud zum Curry-Esse mit de Kerweborsch hergerischtet!
Danke Familie Erdelt!
Dem Agges geheert des Johr aach en großer Dank,
färr de Kerwesamschdag, do gabs trotz Corona en ordentliche Kerwe-Ausschank!
Danke AGTSV unn allen Helfern!
Mer danken aach de Spender vun de Website unn aach vum Stammdisch,
die ganzen Stäh Bier hänn uns geholf, ganz schäh gewaldisch!
Danke Stammtisch und allen Spendern unserer Homepage!
Generell noch emol en große Dank,
an jedie helfendie Hand!
Mer sinn die Ramser - bleibn gesund!
Copyright © 2021 Ramser Kerweborsch – Alle Rechte vorbehalten.
Powered bei Schorle und Bier.
Unsere Website verwendet Cookies. Durch weitere Nutzung dieser Website stimmst du der Verwendung von Cookies zu. Datenschutzerklärung